ಭಟ್ಕಳ (Bhatkal) : ತಾಲೂಕಾಡಳಿತ, ತಾಲೂಕು ಪಂಚಾಯತ, ಪುರಸಭೆ ಹಾಗೂ ಜಾಲಿ ಪಟ್ಟಣ ಪಂಚಾಯತ ಸಂಯುಕ್ತ ಆಶ್ರಯದಲ್ಲಿ ಕನ್ನಡ ರಾಜ್ಯೋತ್ಸವವನ್ನು (Kannada Rajyotsava) ಆಚರಿಸಲಾಯಿತು. ಸಹಾಯಕ ಆಯುಕ್ತೆ ಡಾ. ನಯನ ಶುಕ್ರವಾರದಂದು ತಾಲೂಕು ಆಡಳಿತ ಸೌಧದಲ್ಲಿ ಶ್ರೀ ಭುವನೇಶ್ವರಿ ದೇವಿಗೆ ಪೂಜೆ ಸಲ್ಲಿಸಿ, ಹಸಿರು ನಿಶಾನೆ ತೋರಿಸುವ ಮೂಲಕ ಚಾಲನೆ ನೀಡಿದರು.
ವಿಡಿಯೋ ಸುದ್ದಿ ಮತ್ತು ಮಾಹಿತಿಗಾಗಿ ಭಟ್ಕಳಡೈರಿ ಫೇಸ್‌ಬುಕ್‌ ಪೇಜ್ ಫಾಲೋವ್ ಮಾಡಲು ಇಲ್ಲಿ ಒತ್ತಿ
ಧ್ವಜಾರೋಹಣ ನೆರವೇರಿಸಿ ಮಾತನಾಡಿದ ಸಹಾಯಕ ಅಯುಕ್ತೆ ಡಾ. ನಯನ, ಕನ್ನಡ ನಾಡು ಕವಿಗಳ ಬೀಡು, ಕಲೆ ಸಂಸ್ಕೃತಿಗಳ ನೆಲೆಬೀಡು, ಇಂತಹ ಸುಂದರ ನಾಡಿನ ಹಬ್ಬವನ್ನು ಜಾತಿ, ಮತ, ಪಂಥ, ಧರ್ಮಗಳ ಭೇದವಿಲ್ಲದೆ ಸಂಭ್ರಮದಿಂದ ಕರುನಾಡಿನ ಉದ್ದಗಲಕ್ಕೂ ಆಚರಿಸಲಾಗುತ್ತದೆ. ಅಷ್ಟೇ ಅಲ್ಲದೆ ದೇಶ ವಿದೇಶಗಳಲ್ಲಿ ಕೂಡ ವಿದೇಶಿಗರು ಸಹ ಕನ್ನಡ ಅಭಿಮಾನವನ್ನು ಮೆರೆಯುತ್ತಾರೆ. ಅದರಂತೆ ನಮ್ಮ ತಾಲೂಕಿನಲ್ಲಿ ಸಹ ಅತ್ಯಂತ ಕನ್ನಡ ರಾಜ್ಯೋತ್ಸವವನ್ನು (Kannada Rajyotsava) ಆಚರಿಸಿದ್ದೇವೆ ಎಂದರು.
ವಿಡಿಯೋ ಸಹಿತ ಇದನ್ನೂ ಓದಿ : ಜಾಲಿ ಪಪಂ ಅಧ್ಯಕ್ಷೆಯಿಂದ ಕನ್ನಡ ಭುವನೇಶ್ವರಿಗೆ ಅಗೌರವ
ವಿವಿಧ ಕ್ಷೇತ್ರಗಳಲ್ಲಿ ಸಾಧನೆ ಮಾಡಿದ ಸಾಧಕರ ಪೈಕಿ ಪತ್ರಕರ್ತರ ವಿಭಾಗದಲ್ಲಿ ವಿಷ್ಣು ಎಂ. ದೇವಾಡಿಗ, ಸಂಗೀತ ಕ್ಷೇತ್ರದಲ್ಲಿ ಶಿಕ್ಷಕರಾದ ಮಂಜುಳಾ ಶಿರೂರಕರ ಮತ್ತು ಹೇಮಾ ನಾಯ್ಕ, ಸಾಹಿತ್ಯದಲ್ಲಿ ಮಂಜುನಾಥ ಮುರುಡೇಶ್ವರ, ಜನಪದ ಕಲೆಯಲ್ಲಿ ಕೃಷ್ಣ ಮಾಸ್ತಿ ಗೊಂಡ, ಯಕ್ಷಗಾನದಲ್ಲಿ ಅಚ್ಯುತ್‌ ವೈದ್ಯ ಬೈಲೂರು, ನಾಟಕ ಕ್ಷೇತ್ರದಲ್ಲಿ ರಘುರಾಮ ಮಡಿವಾಳ, ಸೋಬಾನೆ ಪದ ಕ್ಷೇತ್ರದಲ್ಲಿ ಕಾಳಿ ಸಂಕಯ್ಯ ಗೊಂಡ, ಸಂಗೀತ-ಭಜನೆಯಲ್ಲಿ ಗಣಪತಿ ಶಿರೂರು, ಸಮಾಜ ಸೇವೆ ವಿಭಾಗದಲ್ಲಿ ಡಿ.ಬಿ ನಾಯ್ಕ ಮತ್ತು ಫಯಾಜ್ ಎಚ್ ಮುಲ್ಲಾ ಅವರನ್ನು ಗೌರವಿಸಿ, ಸನ್ಮಾನಿಸಲಾಯಿತು.
ಇದನ್ನೂ ಓದಿ : ೪೮ ಗಂಟೆಗಳಲ್ಲಿ ೮ ಆನೆಗಳ ಸಾವು
ಇದೇ ಸಂದರ್ಭದಲ್ಲಿ ೨೦೨೩-೨೪ನೇ ಸಾಲಿನ ಎಸ್.ಎಸ್.ಎಲ್.ಸಿ. ಪರೀಕ್ಷೆಯಲ್ಲಿ ಕನ್ನಡ ಮಾಧ್ಯಮದಲ್ಲಿ ಅತೀ ಹೆಚ್ಚು ಅಂಕ ಪಡೆದು ಮೊದಲ ಮೂರು ಸ್ಥಾನ ಪಡೆದ ಹರ್ಷ ನಾಗಯ್ಯ ಗೊಂಡ, ಭಾವನಾ ಪ್ರಭಾಕರ ನಾಯ್ಕ, ಮಾಧುರಿ ಕೃಷ್ಣ ಗೊಂಡ ಅವರನ್ನು ಸನ್ಮಾನಿಸಲಾಯಿತು. ಅತ್ಯುತ್ತಮ ದೀಪಾಲಂಕಾರ ಮಾಡಿದ ಸರ್ಕಾರಿ ಕಚೇರಿಗಳಲ್ಲಿ ಮೊದಲ ಸ್ಥಾನ ಭಟ್ಕಳ ಪುರಸಭೆ ಪಡೆದುಕೊಂಡಿತು. ಉತ್ತಮ ಟಾಬ್ಲೋದಲ್ಲಿ ಮೊದಲ ಸ್ಥಾನ ಭಟ್ಕಳ ವಲಯ ಅರಣ್ಯ ಕಚೇರಿ, ಎರಡನೇ ಸ್ಥಾನ ಕ್ಷೇತ ಶಿಕ್ಷಣಾಧಿಕಾರಿ ಕಚೇರಿ ಹಾಗೂ ಮೂರನೇ ಸ್ಥಾನ ಶಿಶು ಅಭಿವೃದ್ಧಿ ಯೋಜನಾಧಿಕಾರಿಗಳು ಮತ್ತು ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆ ಪಡೆದುಕೊಂಡಿತು.
ಇದನ್ನೂ ಓದಿ : ತಹಶೀಲ್ದಾರ ವಿರುದ್ಧ ಆರ್‌ಟಿಐ ಕಾರ್ಯಕರ್ತರಿಗೆ ಗೆಲುವು
ಕನ್ನಡ ನಾಡು-ನುಡಿಯ ಬಗ್ಗೆ ಕನ್ನಡ ಸಾಹಿತ್ಯ ಪರಿಷತ್ ತಾಲೂಕಾಧ್ಯಕ್ಷ ಗಂಗಾಧರ ನಾಯ್ಕ ಉಪನ್ಯಾಸ ನೀಡಿದರು. ವೇದಿಕೆಯಲ್ಲಿ ತಹಶೀಲ್ದಾರ ಅಶೋಕ ಎನ್ ಭಟ್, ಕ್ಷೇತ್ರ ಶಿಕ್ಷಣಾಧಿಕಾರಿ ವೆಂಕಟೇಶ ನಾಯ್ಕ, ಭಟ್ಕಳ ಪುರಸಭೆ ಅಧ್ಯಕ್ಷ ಅಲ್ತಾಫ್ ಮೊಹಿದ್ದೀನ್ ಖರೂರಿ, ಜಾಲಿ ಪಟ್ಟಣ ಪಂಚಾಯತ ಅಧ್ಯಕ್ಷೆ ಖಾಜಿಯಾ ಅಫ್ಸಾ ಹುಜೈಫಾ, ಭಟ್ಕಳ ಪುರಸಭೆ ಮುಖ್ಯಾಧಿಕಾರಿ ವೆಂಕಟೇಶ ಮೆಸ್ತ ಹಾಗೂ ಜಾಲಿ ಪಟ್ಟಣ ಪಂಚಾಯತ ಮುಖ್ಯಾಧಿಕಾರಿ ಮಂಜಪ್ಪ ಉಪಸ್ಥಿತರಿದ್ದರು. ಆರಂಭದಲ್ಲಿ ಧ್ವಜಾರೋಹಣವನ್ನು ಸಹಾಯಕ ಅಯುಕ್ತೆ ಡಾ.ನಯನ ನೆರವೇರಿಸಿದರು. ಸಭಾ ಕಾರ್ಯಕ್ರಮ ನಂತರ ಪ್ರೌಢಶಾಲೆ ವಿದ್ಯಾರ್ಥಿಗಳಿಂದ ಸಾಂಸ್ಕೃತಿಕ ಕಾರ್ಯಕ್ರಮ ನಡೆಯಿತು.
ಇದನ್ನೂ ಓದಿ : ಬೈಕ್‌ ಅಪಘಾತದಲ್ಲಿ ಮಹಿಳೆ ಸಾವು
ಕಾರ್ಯಕ್ರಮಕ್ಕೂ ಪೂರ್ವದಲ್ಲಿ ತಾಲೂಕಾಡಳಿತ ಸೌಧದಲ್ಲಿ ಶ್ರೀ ಭುವನೇಶ್ವರಿ ದೇವಿಗೆ ಸಹಾಯ ಆಯುಕ್ತರು, ಅಧಿಕಾರಿಗಳು ಪೂಜೆ ಸಲ್ಲಿಸಿದರು. ಅಲ್ಲಿಂದ ಮೆರವಣಿಗೆ ಸಾಗಿ ಸಂಶುದ್ದೀನ್‌ ಸರ್ಕಲ್‌ ಮಾರ್ಗವಾಗಿ ತಾಲೂಕು ಕ್ರೀಡಾಂಗಣಕ್ಕೆ ಆಗಮಿಸಿತು. ಮೆರವಣಿಗೆಯೂದ್ದಕ್ಕೂ ಪುಟಾಣಿ ಮಕ್ಕಳು ವಿವಿಧ ಸ್ವಾತಂತ್ರ್ಯ ಹೋರಾಟಗಾರ ವೇಷಧಾರಿಯಲ್ಲಿ ಪಾಲ್ಗೊಂಡರು. ಮೆರವಣಿಗೆಯಲ್ಲಿ ವಿವಿಧ ಇಲಾಖೆಗಳ ಟಾಬ್ಲೋಗಳು ಎಲ್ಲರ ಆಕರ್ಷಣೆಯಾಗಿತ್ತು.
ಇದನ್ನೂ ಓದಿ : ಶಿಕ್ಷಕರ ತರಬೇತಿ ಕಾರ್ಯಾಗಾರ ಯಶಸ್ವಿ
