ಭಟ್ಕಳ ಡೈರಿ ವರದಿ
ಭಟ್ಕಳ: ಸೋನಾರಕೇರಿಯ ಮಹಾಲೆಮನೆಯ ಶ್ರೀ ಮಹಾಗಣಪತಿ ಶ್ರೀ ಮಂಡಲೇಶ್ವರ ದೇವಸ್ಥಾನದಲ್ಲಿ ತಲೆತಲಾಂತರಗಳಿಂದ ನಡೆದುಕೊಂಡು ಬರುತ್ತಿರುವ ೧೧ ದಿನಗಳ ಗಣೇಶೋತ್ಸವ ಗುರುವಾರ ಸಂಭ್ರಮದಿಂದ ಸಂಪನ್ನಗೊಂಡಿತು. ಗೌರಿ-ಗಣೇಶನ ಪ್ರತಿಷ್ಠಾಪನೆಯೊಂದಿಗೆ ಆರಂಭವಾಗುವ ಈ ವಿಶಿಷ್ಟ ಕುಟುಂಬೋತ್ಸವವನ್ನು ಮಹಾಲೆ ಕುಟುಂಬದವರು ಪ್ರತಿವರ್ಷ ಒಗ್ಗಟ್ಟಿನಿಂದ ಆಚರಿಸುತ್ತಾರೆ.
೧೨೦ಕ್ಕೂ ಹೆಚ್ಚು ವರ್ಷಗಳ ಇತಿಹಾಸ: ಮಹಾಲೆಮನೆಯ ಗಣೇಶೋತ್ಸವಕ್ಕೆ ನಿಖರವಾಗಿ ಯಾವ ವರ್ಷದಿಂದ ಚಾಲನೆ ದೊರೆಯಿತು ಎಂಬುದರ ದಾಖಲೆ ಇಲ್ಲದಿದ್ದರೂ, ೧೨೦ಕ್ಕೂ ಹೆಚ್ಚು ವರ್ಷಗಳ ಇತಿಹಾಸ ಹೊಂದಿದೆ ಎಂದು ಕುಟುಂಬದ ಹಿರಿಯರು ತಿಳಿಸಿದ್ದಾರೆ.
ತಲೆತಲಾಂತರದಿಂದ ನಡೆದುಕೊಂಡು ಬಂದಿರುವ ಸಂಪ್ರದಾಯವನ್ನು ಇಂದಿಗೂ ಕುಟುಂಬದ ಸದಸ್ಯರು ಮುಂದುವರಿಸಿಕೊಂಡು ಬರುತ್ತಿದ್ದಾರೆ. ಭಟ್ಕಳದಲ್ಲಿರುವ ಮಹಾಲೆ ಕುಟುಂಬದ ಸದಸ್ಯರಷ್ಟೇ ಅಲ್ಲದೆ, ಪರ ಊರುಗಳಲ್ಲಿ ನೆಲೆಸಿರುವ ಕುಟುಂಬದವರೂ ಗಣೇಶೋತ್ಸವದ ಸಂದರ್ಭದಲ್ಲಿ ಆಗಮಿಸಿ ಸಂಭ್ರಮದಲ್ಲಿ ಪಾಲ್ಗೊಳ್ಳುತ್ತಾರೆ.
ಮಹಾಲೆಮನೆಯಲ್ಲೇ ಗಣೇಶ ಮೂರ್ತಿ ರಚನೆ: ಮಹಾಲೆಮನೆಯ ಗಣೇಶೋತ್ಸವದ ಪ್ರಮುಖ ವಿಶೇಷತೆ ಎಂದರೆ ಗಣೇಶ ಮೂರ್ತಿಯನ್ನು ಮಹಾಲೆಮನೆಯಲ್ಲಿಯೇ ರಚಿಸುವುದು. ನಾಗಪಂಚಮಿಯಂದು ಮೂರ್ತಿ ರಚನೆಗೆ ಮುಹೂರ್ತ ನೆರವೇರಿಸಿ, ಸಂಪ್ರದಾಯಬದ್ಧವಾಗಿ ಗಣೇಶ ಮೂರ್ತಿಯನ್ನು ಸಿದ್ಧಪಡಿಸಲಾಗುತ್ತದೆ. ನಂತರ ಶ್ರೀ ಮಹಾಗಣಪತಿ ಶ್ರೀ ಮಂಡಲೇಶ್ವರ ದೇವಸ್ಥಾನದ ಆವರಣದಲ್ಲಿ ಮೂರ್ತಿಯನ್ನು ಪ್ರತಿಷ್ಠಾಪಿಸಿ ೧೧ ದಿನಗಳ ಕಾಲ ಪೂಜಿಸಲಾಗುತ್ತದೆ.
ಪ್ರತಿದಿನ ಪೂಜೆ, ಭಜನೆ: ೧೧ ದಿನಗಳ ಕಾಲ ಪ್ರತಿದಿನ ಮಧ್ಯಾಹ್ನ ಮತ್ತು ರಾತ್ರಿ ವಿಶೇಷ ಪೂಜೆ ನಡೆಯುತ್ತದೆ. ಇದರ ಜೊತೆಗೆ ಕುಟುಂಬದ ಸದಸ್ಯರಿಂದ ಸಾಮೂಹಿಕ ಭಜನೆ ಕಾರ್ಯಕ್ರಮವೂ ನಡೆಯುತ್ತದೆ. ಪ್ರತಿ ಪೂಜೆಯ ಜವಾಬ್ದಾರಿಯನ್ನು ಕುಟುಂಬದ ಒಂದೊಂದು ಮನೆಯ ಸೇವಾಕರ್ತರು ಸ್ವಯಂಪ್ರೇರಿತರಾಗಿ ವಹಿಸಿಕೊಳ್ಳುವುದು ಇಲ್ಲಿನ ಮತ್ತೊಂದು ವಿಶೇಷ ಸಂಪ್ರದಾಯವಾಗಿದೆ. ಕುಟುಂಬದ ಮಕ್ಕಳು ಮತ್ತು ಮಹಿಳೆಯರೂ ಪೂಜಾ ಸೇವೆ ನೀಡುತ್ತಾರೆ.
ಭಟ್ಕಳದ ಏಕೈಕ ಕುಟುಂಬೋತ್ಸವ:
ಮಹಾಲೆಮನೆಯ ಗಣೇಶೋತ್ಸವವು ೧೧ ದಿನಗಳ ಕಾಲ ಗಣಪತಿ ಪೂಜೆ ನಡೆಯುವ ಭಟ್ಕಳದ ಏಕೈಕ ಕುಟುಂಬೋತ್ಸವ ಆಗಿದೆ. ಗಣೇಶೋತ್ಸವದ ಆರಂಭದಿಂದಲೇ ಯುವಕರು ಮಂಟಪದ ಸಿದ್ಧತೆ ಮತ್ತು ಅಲಂಕಾರದಲ್ಲಿ ತೊಡಗಿಸಿಕೊಂಡರೆ, ಕುಟುಂಬದ ಮಹಿಳೆಯರು ಮತ್ತು ಪುರುಷರು ಒಟ್ಟಾಗಿ ವಿವಿಧ ಸಂದರ್ಭಗಳಲ್ಲಿ ಅಡುಗೆ, ಶ್ರೀದೇವರ ನೈವೇದ್ಯ ತಯಾರಿಸುತ್ತಾರೆ.
ಚೌತಿಯಂದು ಅನ್ನಸಂತರ್ಪಣೆ: ಗಣೇಶ ಚೌತಿಯಂದು ಕುಟುಂಬದ ವತಿಯಿಂದ ಅನ್ನಸಂತರ್ಪಣೆ ನಡೆಯುತ್ತದೆ. ಕುಟುಂಬದ ಸದಸ್ಯರೆಲ್ಲರೂ ಒಗ್ಗೂಡಿ ಅಡುಗೆ ತಯಾರಿಸಿ, ಅನ್ನಸಂತರ್ಪಣೆಯ ವ್ಯವಸ್ಥೆಯನ್ನು ನಿರ್ವಹಿಸುತ್ತಾರೆ.
ವಿಸರ್ಜನೆ ದಿನ ವಿಶೇಷ ಕಾರ್ಯಕ್ರಮ: ಗಣೇಶ ವಿಸರ್ಜನೆಯ ದಿನ ಕುಟುಂಬದ ಪ್ರತಿಭಾವಂತ ಮಕ್ಕಳನ್ನು ಪ್ರತಿಭಾ ಪುರಸ್ಕಾರದ ಮೂಲಕ ಗೌರವಿಸಲಾಯಿತು. ಇದರ ಜೊತೆಗೆ ಫಲಾವಳಿಗಳ ಸವಾಲು ನಡೆಯಿತು.
ಮಹಾಲೆಮನೆಯ ಬಾವಿಯಲ್ಲಿ ವಿಸರ್ಜನೆ:
೧೧ ದಿನಗಳ ಪೂಜೆಯ ಬಳಿಕ ಮಹಾಲೆಮನೆಯ ಆವರಣದಲ್ಲಿರುವ ಬಾವಿಯಲ್ಲಿ ಗಣೇಶ ಮೂರ್ತಿಯ ವಿಸರ್ಜನೆ ನೆರವೇರಿಸಲಾಯಿತು. ಗಣೇಶೋತ್ಸವದ ಪ್ರತಿಯೊಂದು ಹಂತದಲ್ಲೂ ಕುಟುಂಬದ ಹಿರಿಯರಿಂದ ಹಿಡಿದು ಮಕ್ಕಳು ಮತ್ತು ಯುವಜನರವರೆಗೆ ಎಲ್ಲರೂ ಒಟ್ಟಾಗಿ ಭಾಗವಹಿಸುವ ಮೂಲಕ ಮಹಾಲೆಮನೆಯ ಸಂಪ್ರದಾಯವನ್ನು ಮುಂದುವರಿಸಿದರು.
ಒಟ್ಟಿನಲ್ಲಿ, ಕುಟುಂಬದ ಎಲ್ಲ ಸದಸ್ಯರನ್ನು ಒಂದೆಡೆ ಸೇರಿಸಿ ಧಾರ್ಮಿಕ ಆಚರಣೆ, ಭಜನೆ, ಅನ್ನಸಂತರ್ಪಣೆ ಮೂಲಕ ೧೧ ದಿನಗಳ ಕಾಲ ಒಗ್ಗಟ್ಟಿನ ಸಂದೇಶ ಸಾರಿದ ಮಹಾಲೆಮನೆಯ ಗಣೇಶೋತ್ಸವ ಮತ್ತೊಂದು ವರ್ಷ ಯಶಸ್ವಿಯಾಗಿ ಸಂಪನ್ನಗೊಂಡಿತು.
ಇದನ್ನೂ ಓದಿ :
VB–G RAM–G/ ಗ್ರಾಮೀಣ ಜನರ ಸಬಲೀಕರಣವೇ ವಿಕಸಿತ ಭಾರತದ ನಿಜವಾದ ಅಡಿಪಾಯ: ರಾಜೇಶ ಮಹಾಲೆ
Karate Competition/ ತುಷಾರ ಮಹಾಲೆ ಸಹಿತ ೧೬ ವಿದ್ಯಾರ್ಥಿಗಳು ರಾಜ್ಯಮಟ್ಟಕ್ಕೆ
