ಉಮೇಶ ಮುಂಡಳ್ಳಿ ಅವರ 'ಕಾಸ್ಮುಡಿ ಹನುಮಂತ ಬಾರೋ' ಭಕ್ತಿಗೀತೆ ಬಿಡುಗಡೆ

ಭಟ್ಕಳ : ಜಿಲ್ಲೆಯ ಭಾವಕವಿ, ರಾಜ್ಯ ಪ್ರಶಸ್ತಿ ಪುರಸ್ಕೃತ ಕವಿ, ಗಾಯಕ ಉಮೇಶ ಮುಂಡಳ್ಳಿ ಅವರು ಬರೆದು ಹಾಡಿರುವ ಶ್ರೀ ಕಾಸ್ಮುಡಿ ಹನುಮಂತ ಬಾರೋ ಭಕ್ತಿಗೀತೆ ಇಂದು ಬಿಡುಗಡೆಗೊಂಡಿತು.

ಇದನ್ನೂ ಓದಿ : ಮುರುಡೇಶ್ವರ ಕ್ಷೇತ್ರದಲ್ಲಿ ಮಹಾಶಿವರಾತ್ರಿ ಆಚರಣೆ ನಿಮಿತ್ತ ಪೂರ್ವಭಾವಿ ಸಭೆ
ಕಾಸ್ಮುಡಿ ಶ್ರೀ ಹನುಮಂತ ದೇವಸ್ಥಾನ ಪುನರ್ ಪ್ರತಿಷ್ಠಾಪನೆಯ ಮೊದಲ ದಿನವಾದ ಫೆ.೨೯ರಂದು ಉಮೇಶ ಮುಂಡಳ್ಳಿ ಸ್ವತಃ ಸಾಹಿತ್ಯ ಬರೆದು ಸ್ವರಸಂಯೋಜನೆ ಮಾಡಿ ಹಾಡಿರುವ ಕಾಸ್ಮುಡಿ ಹನುಮಂತ ಬಾರೋ ಭಕ್ತಿಗೀತೆ ಬಿಡುಗಡೆ ಕಾರ್ಯಕ್ರಮ ಆಯೋಜಿಸಲಾಗಿತ್ತು.

ಸತ್ಯಸಾಯಿ ಸೇವಾ ಸಮಿತಿಯ ಜಿಲ್ಲಾ ಪ್ರಮುಖ ಆರ್.ಭಾಸ್ಕರ ನಾಯ್ಕ ಅವರು ಮುಂಡಳ್ಳಿ ಅವರು ಹಾಡಿರುವ ಭಕ್ತಿ ಗೀತೆಯನ್ನು ಬಿಡುಗಡೆಗೊಳಿಸಿ ಮಾತನಾಡಿದರು. ಭಗವಂತ ಎಲ್ಲಕ್ಕಿಂತ ಮಿಗಿಲಾಗಿ ಭಕ್ತಿಗೆ ಬೇಗ ಒಲಿಯುತ್ತಾನೆ. ಭಕ್ತಿ ಇಲ್ಲದ ದಾನ ಸೇವೆ ನಿರರ್ಥಕ. ನಾಮಸ್ಮರಣೆ ಮತ್ತು ಭಜನೆಯಿಂದ ದೇವರು ಬೇಗ ಸಂತುಷ್ಟನಾಗುತ್ತಾನೆ. ಅಂತಹ ಭಕ್ತಿಪೂರ್ಣ ಗೀತೆಯನ್ನು ಮುಂಡಳ್ಳಿ ಅವರು ಅರ್ಪಿಸಿದ್ದಾರೆ ಎಂದರು.

ದೇವಸ್ಥಾನನ ಆಡಳಿತ ಮಂಡಳಿ ಅಧ್ಯಕ್ಷ ಅಣ್ಣಪ್ಪ ನಾಯ್ಕ ಅಬ್ಬಿಹಿತ್ಲು ಮಾತನಾಡಿ, ಕಾಸ್ಮುಡಿ ಹನುಮಂತನೇ ಉಮೇಶ ಅವರಿಂದ ಇಷ್ಟು ಸೊಗಸಾದ ಗೀತೆಯನ್ನು ಬರೆಸಿದ್ದಾನೆ. ನಮ್ಮ ನಡುವೆ ಇರುವ ಇಂತಹ ಪ್ರತಿಭಾನ್ವಿತರಿಗೆ ಎಲ್ಲ ರೀತಿಯಿಂದಲೂ ಸಹಕಾರ, ಪ್ರೊತ್ಸಾಹದ ಅಗತ್ಯತೆ ಇದೆ. ಈ ಗೀತೆ ಎಲ್ಲರ ಮನೆ ಮಾತಾಗುವುದರಲ್ಲಿ ಯಾವುದೇ ಅನುಮಾನವಿಲ್ಲ ಎಂದರು.

ಅಧ್ಯಕ್ಷತೆ ವಹಿಸಿದ್ದ ಪ್ರಕಾಶ ನಾಯ್ಕ ಮಾತನಾಡಿ, ನಾಸ್ತಿಕರನ್ನು ಆಸ್ತಿಕರನ್ನಾಗಿಸುವ ಶಕ್ತಿ ಈ ಗೀತೆಗಿದೆ ಎಂದು ಗಾಯಕರಿಗೆ ಶುಭ ಹಾರೈಸಿದರು.

ವೇದಿಕೆಯಲ್ಲಿ ಭಾಸ್ಕರ್ ಎಸ್ ನಾಯ್ಕ, ಗಾಯಕಿ ಉಮಾ ಕಿಣಿ, ಅಣ್ಣಪ್ಪ ನಾಯ್ಕ ಅಬ್ಬಿಹಿತ್ಲು, ಜ್ಯೋತಿ ಈರಪ್ಪ ಗರ್ಡಿಕರ್, ಮೃತ್ಯುಂಜಯ ಆಚಾರ್ಯ ಮೊದಲಾದ ಗಣ್ಯರು ಉಪಸ್ಥಿತರಿದ್ದರು.
ಮಾಲತಿ ರಾಜೇಶ ನಾಯ್ಕ ಸ್ವಾಗತಿಸಿದರು. ವಿಶ್ವನಾಥ ಆಚಾರ್ಯ ವಂದಿಸಿದರು.